Contatto web
Cui che o sin
IL CÔR FEMINÎL PLOE DI ROSIS
Il côr feminîl "Ploe di rosis" di Grions di Sedean al nas tal 1997, sburtât de volontât di animâ il servizi liturgjic de sô comunitât e dal interès dal Sindic Corrado Olivo.
Il so non al è stât sielt leint la poesie "Ploe di rosis", de poete Francesca Nimis, origjinarie di Palme, che e je vivude dal 1874 al 1959.
"Ploe di rosis"
"Tu vignivis jù pe braide,
"cjantuçant a mieze vôs;
"la musute blancje e rosse,
"il biel voli pinsirôs.
"Tal moment che tu passavis
"sot il cjariesar in flôr,
"come flocs di nêf lis fueis,
"ti an svolât ator, ator.
"Ploe di rosis je fortune -
"jo ti ai dite di lontan!...
Tu mi sês corude incuintri,
"sin lâts vie cjapâts par man.
In chescj viers, lis coristis si son spieladis tant che côr zovin, fresc e cu la volontât di stâ insiemi cirint di meti dongje alc di biel pal lôr piçul paîs.
In chescj agns di ativitât, il côr, nol à dome cjapât part in maniere ative aes liturgjiis de sô comunitât, ma al à partecipât a diviers incuintris corâls, in particolâr o ricuardìn: lis tantis edizions de Rassegne de Vierte e "Cantiamo il Natale" inmaneadis dal Comun di Sedean, lis liturgjiis par furlan li dal Oratori de Puritât di Udin, la "Lucciolata per la Via di Natale" a San Lurinç, la Fraternitât Sacerdotâl di Udin, la colaborazion cu la Associazion Culturâl "pari David Maria Turoldo" di Coder, i Congrès dai Pueri Cantores a Spilimberc, Cividât, Udin e Aquilee, il conciert "Cantando, cantando in girotondo" promovût de Union Societât Corâls dal Friûl Vignesie Julie e il pelegrinaç a Barbane.
Dal 2001, in ocasion de fieste che e ven fate par Sante Ane, une fieste une vore sintude de comunitât di Grions, il côr al met adun il conciert "Insieme...cantando", cun chê di promovi il cjant e la musiche e cun chê di fâ cognossi lis altris realtâts musicâls che si cjatin ator. Cun di plui, il conciert al è simpri a caratar benefic.
Il repertori al cjape dentri soredut musiche sacre, di autôrs modernis e di chei dal dì di vuê, cuntune atenzion particolâr pai tocs in lenghe furlane sedi de tradizion che dai compositôrs modernis.
Il côr atuâl al è fat di: Vittorina Cargnelli, Tanya Del Bianco, Mariarosa Della Vedova, Ambra Di Fant, Roberta Grillo, Giada Gris, Giada Piccolotto, Luciana Pizzuto, Rita Prenassi, Alessia Valoppi.
Fin dal imprin de sô costituzion il côr al è diret de dotore Nada Minuzzi. La insegnante e à scomençât i studis musicâi di pianoforte li de Associazion musicâl e culturâl "Armonie" di Sedean, po si è laureade in Conservazion dai bens culturâi di direzion musicâl, e à frecuentât cors di cjant gregorian e di musiche contemporanie. Invezit i organiscj a son: Gabriele Cecco e Daniele Giacomuzzi. Ducj doi a àn finît i studis musicâi di pianoforte cul mestri Luciano Turello li de Associazion musicâl e culturâl "Armonie".
