Cui che o sin
Une lungje storie di cjant e di servizi pal paîs
Ancje se si pues suponi une costituzion, che no je documentade, ma che e va indaûr fintremai al 1600, cheste realtât e ven notade di mût uficiâl tal 1903 cuant che lis istituzions locâls a àn scomençât a regjistrâ dutis lis formis di associazionisim presintis in maniere ative sul teritori.
La cjantorie e nas tant che corâl fate di oms e e cjape il non dal Sant Patron di Grediscje par volê dal plevan di chê volte pre Leonardo Gozzi e cu la colaborazion di Luigi Mezzavilla "Plàsio" che al à clamât dongje i paisans amants dal cjant.
Di Luigi Mezzavilla e dai siei fîs, che po dopo a àn cjapât part ae cjantorie tant che cjantôrs e le àn compagnade cul armonium, si à di ricuardâ lis capacitâts artesanâls te costruzion di chescj imprescj, ancjemò funzionants in dì di vuê e ancje ben mantignûts. Di chi e partìs la ativitât de Corâl che e conte un ampli repertori sacri e di cjants popolârs; chescj ultins a jerin tal imprin dome par furlan e po dopo si son slargjâts ancje a cjants nazionâi e internazionâi.
In chei timps, i "Plàsio" a forin judâts te direzion di Valentino Masotti "Barbarìn", po dopo di Antonio Gnesutta "San Pauli", di Vincenzo Severino Venier "Marcs" e di Michele Clabassi, cu lis dificoltâts determinadis de mancjance di imprescj adats: la intonazion e vignive dade cul diapason e il studi des notis al jere basât sul seticlâf. Di chê volte a cumò cheste istituzion, mudade di mût temporani in côr di vôs miscliçadis tai agns cincuante e restade cussì di mût definitîf tal 2001, no si è mai fermade: plui di un secul di ativitât che se viodude cussì in aparence no dîs nuie di impuartant ma che e à un valôr cence misure se si pense al spirt di servizi volontari ufiert di tantis personis e indreçât ae parochie e, di riflès, ae comunitât dal paîs. (il jutori continui tai moments religjôs cuntune atenzion particolâr a chei plui solens, la organizazion e la colaborazion par tantis ocasions di agregazion cemût che a son il "Ringraziament", la "Fieste in place", "Fiesteintor", lis escursions, il Nadâl in place, e v.i.).
Tornant in struc ae nestre storie o vin di ricuardâ i altris diretôrs che a son vignûts dopo di Michele Clabassi: tal 1946-47 Plinio Clabassi che po al è lât a stâ a Rome indulà che al à cjapât la strade dal cjant liric che lu à puartât tai plui grancj teatris dal mont; dopo al è stât Giacinto Brun che, judât dal fi Giuseppe (Bepin), al à direzût la Corâl par plui di trente agns; dal 1978 il diretôr al è stât Glauco Venier che si è diplomât in orghin e po si è dedeât ae conciertistiche che lu à puartât a jessi un artist di fame a nivel internazionâl; Vittorio Pianta che, ancje se nol è di Grediscje, dal 1986 al 2005, al à dimostrât dedizion e passion; e par finî Fabiola Venier, zovine diretore che e vuide il grup di pôc plui di un an ma che e sta bielzà cjapant sù i risultâts di un spirt gnûf.
Un periodi di consens stuzighins al è stât chel che al va dal 1960 indenant stant che ancje in glesie al risulte jessi disponibil un palc di orchestre (ancje dite "orchestre") slargjât e un orghin gnûf Zanin volût dal plevan di chê volte Pre Gino Zuliani daûr dal progjet dal innomenât musicist Bons. Pigani. A chest rivuart al è un plasê ricuardâ il conciert une vore biel fat pe lôr scree di Bons. Albino Perosa. Un moment particolarmentri dolorôs invezit al è stât chel che al è vignût subite daûr dal mês di Dicembar dal 1971 e che al à viodût ruvinâsi l'orghin stes e la plui part de documentazion musicâl par cause dal fûc che si è slargjât te parochiâl; o vin di ringraziâ "Bepin" di Brun, l'organist, no dome par vê recuperât lis partiduris e i spartîts ma ancje pe pazience e pal amôr che al à simpri ufiert: virtût che al à pandût fin ae sô muart tal Setembar dal 1998, dopo plui di cincuante agns di servizi apassionât e disinteressât.
In dì di vuê la corâl e je fate di 30 cjantôrs sù par jù, jenfri chescj 10 a son feminis; e gjolt de colaborazion ative di Veridiana Zanello, organiste zovine nassude a Grediscje che e sigure il jutori puntuâl e costant ancje tes celebrazions di domenie e di altris ocasions vie pal an. La Corâl e met dongje ativitâts continuis in Parochie durant dut l'an liturgjic e in altris ocasions esternis sedi te Regjon che fûr di cheste, in rassegnis e scambis cun realtâts similârs.
Il repertori sacri une vore grant al va des Messis e dai tocs dai plui famôs composidôrs "storics" de nestre tiere (Tomadini, Candotti, Pigani, Perosa, Rosso, Foraboschi, e v.i.) e di chei che no jerin furlans (Palestrina, Mozart, Verdi, Bach, Beethoven, Berthièr, e v.i.) a chel profan (popolâr e classic) di De Marzi, Garzoni, Zardini, Seghizzi, e v.i.
La Corâl "S. Stiefin" e à ufiert une valevule suaze pal so centenari di fondazion celebrât ai 11-12-13 e 18 di Lui dal 2003 cun manifestazions di particolâr valôr musicâl che a àn cjatât la lôr piche pe cualitât e pe partecipazion tal musical "Fra cielo e terra" e te rassegne strumentâl e corâl pensade e vuidade di doi artiscj di Grediscje: Ivo Valoppi e Glauco Venier.
O sintìn il desideri di fâ une menzon speciâl:
ai cjantôrs che no son plui ma che tant a àn dât ae Comunitât di Grediscje:
Luigi Mezzavilla "Plàsio" (il vieli e il zovin), Fulvio Mezzavilla "Plàsio", Valentino Masotti "Barbarìn", Antonio Gnesutta "San Pauli", Vincenzo Severino Venier "Marcs", Michele Clabassi, Plinio Clabassi (anche direttore della Cantoria), Giacinto Brun, Guido Venier "Grisc", Eugenio Venier "Grisc", Ugo Valoppi "Tole", Luigi Venier "Rosso", Luigi Cecchini "Dorigo", Romano Valoppi "Michelùt", Renzo Brazzoni "Bargìt", Olivo Fantini, Nevio Clabassi, Dante Contardo, Giuseppe Zorzi, Giuseppe Brun, Giovanni Mazzeri, Quinto Venier "dal Muni", Luigi Venier "Fari", Armida Contento, Vincenzo Ferdinando Brun, Luigi-Rodolfo Venier "Fari", Beppino Venier "Muni grant", Pietro Grillo, Giacomo Minuzzi, Zoreo Spigarolo, Ugo Gallo, Francesco Clabassi, Arrigo Valoppi.
ai cjantôrs che par motîfs e impediments diviers no puedin plui dâ, ancje dome in maniere temporani, il lôr jutori:
Adelino Venier, Arrigo Venier, Gianni Moretti, Ferruccio Valoppi, Stefano Valoppi, Luigino Brun, Umberto Mansutti, Plinio Donati, Beppino Valoppi, Glauco Venier, Tomas De Pol, Maurizio Grillo, Eric Perin, Paolo Molon, Marta Venier , Romolo Valoppi, Loris Licit, Giancarlo Venier, Dino Venier (segretario per diversi anni), Valneo Venier, William Moretti, Giocondo Venier, Clara Moretti, Leonilda Brun, Marcella Venier, Annamaria Venier, Pierina Brun, Lidia Venier, suor Assuntina Valoppi, Luca Venier , Federico Venier , Pietro Fantini, Mario Venier, Vittorio Pianta, Eugenia Martinuzzi, Sonia Carrieri, Gianni Brazzoni. Mario Sonda, William Venier, Danilo Bressanutti, Romina Contardo.
A ducj lôr, ai organiscj di fûr Olindo Bosa e Andrea Valentinis pe disponibilitât, al Plevan pre Mario e al Consei Pastorâl Parochiâl pe atenzion e la sensibilitât, al vadi in nestri sancîr grazie di cûr.
Corâl "S. Stiefin"- Grediscje di Sedean
Par vê informazions si à di indreçâsi a:
Fabiola Venier 0432916168 e 0432915203
Email:
