Associazion socio-culturâl pari David Maria Turoldo

Responsabil

pre Plinio Donati

Cui che o sin

La Associazion pari David Maria Turoldo e à la sô sede li de cjase indulà che al è nassût il frari, a Coder di Sedean. La idee di meti adun une associazion a lui dedeade e je stade promovude propit dopo de sô muart di bande di cualchi so amì, di chei che lu àn cognossût e stimât. La finalitât e je chê di studiâ in maniere critiche la figure e il pinsîr di pari Turoldo, in particolâr i aspiets che a son leâts ae storie culturâl, sociâl e religjose dal mont, de Italie e dal Friûl.

L'articul 2.2 dal statût al stabilìs chest:

“La Associazion, cence finalitât di vuadagn, e à tant che obietîf chel di onorâ la memorie di pari David Maria Turoldo. Par chest, tes formis e cui mieçs che si ritignaran plui adats, si cirarà di promovi la restaurazion conservative de cjase native di Coder tant che lûc de "memorie"; di promovi la realizazion di un “centri di documentazion” de opare poetiche, leterarie e religjose di pari Turoldo; di studiâ e di pandi il pinsîr di Turoldo, fasint ben atenzion aes sôs “lidrîs furlanis” e ae vierzidure particolâr e cosmopolite che al veve metût in pîts tai rivuarts de culture taliane e europeane tal secont dopo vuere; di promovi e organizâ il studi e la difusion de culture contadine di cumò o chê oramai pierdude (cun riferiment, ancje se in maniere no esclusive, al teritori regjonâl) considerade ancje in rapuart cul cont dal dì di vuê; di promovi e inmaneâ manifestazions e ativitâts a caratar artistic, culturâl e sientific leadis aes finalitâts ditis parsore”.

Il president de Associazion al è stât par tant timp pre Nicola Borgo. Il president atuâl al è pre Plinio Donati.