Cui che o sin
GRUP VOCÂL DI FEMINIS "EUTERPE"
Il Grup Vocâl di Feminis "Euterpe" de Associazion Musicâl e Culturâl "Armonie", che al à la sô sede a Grediscje di Sedean (UD), al è stât metût adun di diviers agns tant che completament de pratiche strumentâl dai arlêfs de Scuele di Musiche locâl. Diret fintremai de sô istituzion dal Mestri Fabrizio Giacomo Fabris, il côr al è fat di sîs vôs feminîls: Marta Carafoli, Martina Mattiussi, Chiara e Martina Pressacco, Fabiola e Marinella Venier.
Il grup, cun di plui di cjantâ vie pai saçs de Scuele di Musiche e vie pes iniziativis diferentis inmaneadis de Associazion "Armonie", al cjape part a concierts e manifestazions sedi a nivel provinciâl che regjonâl e tal 2001, dopo cualchi an di ativitât, al à presentât il CD intitulât "Laudate Pueri Dominum". Une part impuartante dal repertori dal côr, che al cjape dentri ancje tocs di Palestrina, Marenzio, Mendellsshon, Verdi, Fauré, Britten, Saint-Säens, Kodaly, Della Picca e altris, e je fate dal cjant gregorian. Par chest gjenar di repertori, tal 2004 il grup al à partecipât aes manifestazions pal decenâl dai Seminaris Internazionâi di Cjant Gregorian in Friûl Vignesie Julie.
Tal mês di Lui dal 2005, la vilie dai SS. Ermacul e Fortunât, il côr al à vude la opurtunitât prestigjose di partecipâ ai "Concierts in Basiliche" te suaze maraveose e sugjestive e jere la Basiliche di Aquilee.
Ae fin dal mês di Otubar dal stes an, il côr al à vût un rûl impuartant te esecuzion de "Missa populorum", opare metude dongje di Avgust Ipavec e presentade cun sucès a Udin e a Viene, insiemi cun altris preseâts grups corâi che a vignivin de Italie, de Austrie e de Slovenie.
Tal 2007 il grup al à cjapât part al "7m Festival Organistic Internazionâl de Citât di Fossalte", ae manifestazion regjonâl "Nativitas", inmaneade de Union Societât Corâls Taliane, e aes manifestazion in onôr di Pari David Maria Turoldo a Coder di Sedean, te cjase indulà che al è nassût.
Ae fin dal mês di Avrîl dal 2008, cun di plui, al è stât clamât tant che ospit speciâl ae iniziative "CANTONDO - Cantando in girotondo", organizade de Union Societâts Corâls Furlanis.
FABRIZIO GIACOMO FABRIS
Al à studiât a Triest sot la vuide dal Mestri L. Gante (pianoforte) e dal Mestri B. Cervenca (cuintripont e composizion). Al à frecuentât cors di cjant gregorian cul Prof. N. Albarosa, cors di musiche rinassimentâl cul Prof. G. Acciai e chei di vocalitât e di direzion corâl cui Mestris O. Contardo, B. Zagni, M. Rizzo, I. Meisters, I. Lukaszewski e L. D'Intino. Al à cjapât part a cors di pedagogjie musicâl cui Mestris M. Martin Llado, M. Alba Vila e N. Conci. Al à diret diviers complès corâi regjonâi in cetantis manifestazions musicâl sedi in Italie che tal forest e, simpri tant che diretôr corâl, al à cjapât part a diviersis trasmissions radiofonichis de RAI dal Friûl Vignesie Julie.
Al ten cors di alfabetizazion musicâl e corâl tes scuelis elementârs e al è mestri di pianoforte in cualchi Scuele di Musiche regjonâl, jenfri chestis la Scuele di Musiche strumentâl e vocâl di Sedean.
