STORIE DAL COMUN

Plaçât sul rivâl a çampe dal Tiliment, dongje di un toc che al è facil di traviersâ, lontan des areis malsanis e cun palûts, il teritori di Sedean al à favorît il stanziâsi di popolazions fintremai di etis antighis, cemût che a testemonein cetancj reperts.
Un dai manufats plui evident e, par sigûr, il plui vieli che si cjate tal teritori, al è il Cjastelîr, che al va indaûr ae epoche preistoriche. I insediaments dai Celtics, che a son vignûts prime de ocupazion di Rome, a àn lassât i fossâi di Sedean e di Grediscje, daspò mudâts in "cortinis" cuant che lis vueris cence fin de Ete di Mieç a àn imponût gnûfs sistemis par difindisi.
Il svilup dât, fintremai de ete di August, da la strade romane che e passe dongje dal teritori a soreli jevât, insiemi ae strade vicinâl che e je paralele al flum, al à prudelât il consolidâsi dai insediaments e il davuelziment de toponomastiche locâl, gjavant fûr il mudament dal non dai abitants di Grions e di Grediscje, sù par jù tal secul XI, durant il periodi dal ripopolament slâf.
Lis primis gnovis scritis a van indaûr al XII e XIII secul e nus dimostrin la impuartance strategjiche dade al teritori dal Patriarcje, dai conts di Gurize e de diocesi di Concuardie. Ma scomençant dal 1309, cuant che o vin la notizie di une prime distruzion des cortinis di Sedean e di Grediscje, no sarà plui spazi pe autonomie, e la gastaldie e restarà sot dai conts di Voleson, ancje dopo de vignude de dominazion di Vignesie tal 1419, fintremai tal 1548 cuant che e vignarà cjapade dai Manin. Lis scorsadis tragjichis dai Turcs dal 1477 e dal 1499 a forin l'ultin event che al colpì i nestris paîs, fintremai ae bataie dal Tiliment tal 1797 jenfri trupis di Napoleon e chês dai Asburcs, disponudis di Turide ae Beorcje Coseat di cumò.
Al va indaûr a chest periodi, e par jessi precîs al 1805, la formazion dal Comun cu lis vot frazions, cussì cemût che lu cognossìn, e cul insediament dal prin Consei Municipâl.
Si pues dîsi che il svilup e lis carateristichis sociâls dal dì di vuê a sedin scomençadis dome daspò de anession al Ream di Italie tal 1866, e a saran cence polse, se si gjave l'an di ocupazion de Austrie tal 1917/18, che al à puartât un periodi plui scûr di chel de vuere civîl dal 1943/45.
Dal 1960 il Comun si è insiorât di une localitât cu la nassite de zone industriâl di Panelie, a sud ovest dal so teritori, li dal arzin dal Tiliment.

SINDICS DI SEDEAN

Periodi Liberâl e Zonte Popolâr (de fin sec. XIX al 1923)
Berghinz Bernardino, classe 1841 (1896-1899)
Cecchini Domenico, classe 1829 (1899-1902)
Berghinz Bernardino, classe 1841 (1902-1905)
Rinaldi Rinaldo, classe 1853 (1905-1909)
Cecchini Francesco, classe 1850 (1909-1914)
Micoli Mattia, classe 1889 (1914-1917)
Cecchini Francesco e Chiesa Valentino (1918: nomenâts dai austriacs durant la invasion 1917-1918)
Micoli Mattia, classe 1889 (1918-1920)
Di Lenarda Angelo, classe 1871 (1920-1923: zonte popolâr)

Periodi Fassist (1923-1944)
Pittana Ernesto, classe 1891 (1923-1926)
Barnaba Attilio, classe 1888 (1926-1927: comissari prefetizi)
Barnaba Attilio, classe 1888 (podestât 1927-1932)
Pittana Ernesto, classe 1891 (podestât 1932-1934)
Rinaldi Giuseppe, classe 1888 (podestât 1934-1943)
Rinaldi Agostino, classe 1898 (comissari prefetizi: 1943-1944)
Chiesa Luigi, classe 1914 (comissari prefetizi: 1944)
Persia Vincenzo (comissari prefetizi: 1944-1945)

Comitât di liberazion e periodi republican (dal 1945)
Menini Gino, classe 1901 (1945: nomenât dal Comitât Comunâl di Liberazion)
Pasqualini Guerrino, classe 1898 (1945-1956)
Zappetti Angelo, classe 1914 (1956-1975)
Venier Amilcare, classe 1939 (1975-1980)
Rinaldi Luigi, classe 1940 (1980-1993)
Olivo Corrado, classe 1953 (in carica dal 1993)

TOPONOMASTICHE
SEDEAN (par furlan Sedèan): "Villa de Sedegliano", "In villa de Sedelano" e v.i. Toponim prediâl latin in -anu che al ven di Setilus. Cualchidun al crôt che al sedi un non slâf di "sedljàne" (=abitant), ma al è mancul probabil. Un Sedillac si cjate in France.
Agnul M. Pittana, I nons dai paîs dal Friûl di Mieç, P.I.C. dal Friûl di Mieç 2002