Comune di Sedegliano

Il non Coder al manifeste in maniere clare une identitât romane, dade dal riferiment de çocje stradâl "quaterno lapide", ma la presince di reperts e di costruzions dentri tai cimitieris fatis a forme di tombe a pandin ancje une identitât leade ae civiltât vignude prime di chê romane. Cheste strade e vignive di Concuardie, e scjavaçave il Tiliment tal vât di Plêf e par Codroip (Quadruvium) si zontave dongje di Glemone ae Julie Auguste. Tal sec. XIII la vile di Coder e jere sot la jurisdizion dal cjistiel di Varian, invezit tal sec. XIV e XV sot dai siôrs di Spilimberc. Dal pont di viste religjôs, Coder al dipendeve di Sedean, ma vie pal sietcent e il votcent la comunitât di Coder al manifestà simpri di plui la necessitât de sô autonomie. Tal 1922 cuntun decret dal Vescul, Coder al otignì la vicjarie e tal 1954 la parochie.

Toponomastiche
CODER (par furlan si lei Codèr): dal latin "quadernum cum decima" (ogni cuarte part) fasint riferiment cun dute probabilitât a une regjon coltivade (allusion pussibile ae centuriazion). La identitât romane e ven ufierte ancje dal riferiment al clap stradâl "quaterno lapide". Agnul M. Pittana, I nons dai paîs dal Friûl di Mieç, P.I.C. del Medio Friuli 2002.

La esistence di monuments preistorics (il Cjastelîr e lis 'Rivis'), di reperts archeologjics, cemût che a son lis urnis pe cinise, cjatadis tal 1746 cuant che a son stâts fats i sgjâfs dentri de cortine, o lis olmis di insediament di Ete Romane tai Lavorês, a stabilissin la esistence di un centri abitatîf che al va indaûr a un periodi che al ven prime di chel che al podarès sugjerî il non slâf di cumò di Grediscje. Il non Grediscje al è stât tirât dongje te epoche dai insediaments slâfs, che si son sucedûts in Friûl sù par jù tal 1000 d.C. A jerin colonos di etnie slave clamâts dal patriarcje par tornâ a popolâ la plane furlane vuastade des invasions dai Ongjars, che si stabilirin indulà che i insediaments di prime a jerin stâts bandonâts. Tal periodi sucessîf a forin fatis sù, a Grediscje e in difarents centris de plane furlane, lis cussì clamadis 'cortinis', sorte di cente ator de glesie, che, no dome a Grediscje, a tornave a doprâ i fossâi profonts (cemût che a son lis nestris 'Rivis') vûts in ereditât des popolazions vignudis prime, gambiantju in elements cun funzion di struturis di difese. Lis vicendis di chest paîs no puedin jessi dividudis dal "grant vât" dal flum Tiliment, che al colegave Grediscje a Voleson par mieç de "strade maiôr", e che e à determinât la sô storie. A chest vât al faseve cjâf la strade che e puartave sù di Aquilee (in chê volte clamade 'Ongjariche', vuê 'Napoleoniche'), e dal moment che l'as dai transits si è spostât viers Udin il paîs di Grediscje al è stât cjapât dentri in maniere ancjemò plui direte. Lis fonts storichis nus disin che, tal secul XII, il patriarcje al à dât chest avampost ai conts di Gurize, che lu an tignût tra alts e bas almancul fintremai ae concuiste dal Friûl di bande di Vignesie, tal 1420. Ancje se infratant si è regjistrât cualchi passaç di proprietât, che a àn cjapât dentri i siôrs di Voleson e ancje chei di Spilimberc, chestis situazions no àn segnât in maniere impuartante il svilup dal paîs. Daspò de distruzion de cortine tal 1309 e tal 1361, il paîs di Grediscje al fo testemoni e vitime des invasions dai Turcs tal 1477 e tal 1499; si segnale une fase di svilup rilevant, ancje dal pont di viste economic, te ultime part de dominazion di Vignesie, ma la 'bataie sul Tiliment', che si combatè tal mês di Març dal 1797 jenfri lis trupis di Napoleon e chês de Austrie, e causionà la dismission dal vât e il progressîf isolament dal paîs. Di chescj fats e dal lunc transit di cumierç si pues dîsi che al nas il caratar particolâr di cheste int. Inte suaze religjose, Grediscje e je nassude tant che comunitât cristiane de plêf origjinarie di Codroip, e par diviers secui e fo leade a San Lurinç e a Poç. Dal 1605 e je deventade une parochie, cu la glesie parochiâl di S. Stiefin protomartar e cun chê di campagne di S. Zorç.

Toponomastiche
GREDISCJE di Sedean (par furlan Grediscje): al è un dai nons plui comuns te toponomastiche dai paîs slâfs e al vûl dî "lûc cenglât, fortificât". Al è probabil che l'insediament di Grediscje al vedi cjapât il non dal cjastelîr (fortificazion di ete preistoriche che al è li dongje). Agnul M. Pittana, I nons dai paîs dal Friûl di Mieç, P.I.C. dal Friûl di Mieç 2002

Su la fonde des ultimis ricercjis, la peraule Grions e ven dal non di une plante, il Grion, la "Celluna vulgaris" par latin, "erica" par talian. Tai documents a disposizion chest tiermin al salte fûr dal mudament di un toponim iniziâl Grilon (1226), Grillons duncje Griglion (sec. XVI), par deventâ daspò in maniere definitive il non Grions dal dì di vuê. Il prin document cognossût, che al fevele di Grions al è dal 1226. Al è un contrat di cession jenfri i nobii e il patriarcje. La particolaritât storiche di Grions di Sedean e je chê di jessi stade, fintremai de prime part de ete di Mieç, dot dôs jurisdizions de Glesie. Un toc dal paîs, chel a est, al jere sot di Sedean e duncje sot dal patriarcjât di Aquilee; chel altri invezit, chel a ovest, al jere sogjet ae diocesi di Concuardie e al stave sot de plêf di Turide. La linie di confin e jere marcade de strade romane viere, che e divideve di mût verticâl di nord a sud il paîs: il toc di Grions che al jere sot Aquilee al jere dal pont di viste numeric plui piçul, dut câs al veve la glesie uniche, al contrari il toc di Grions sot Concuardie al veve plui abitants, ma al jere cence lûcs di cult. Dut chest al à causionât cetantis barufis jenfri il plevan di Sedean e chel di Turide. Dome ai 20 di Jugn dal 1920 Grions, cun decret dal Vescul, e je deventade tant che vicjarie, distacade di Sedean e tal 1954 e je deventade parochie: il prin plevan clamât a vuidâ la parochie e fo don Giovanni Battista Compagno.

Toponomastiche
GRIONS di Sedean (par furlan Griòns): "in Grilons", "de Grillons" e v.i. Viôt il furlan grîòn (erica, gracchia), non di plante che si presum di origjine preromane. Agnul M. Pittana, I nons dai paîs dal Friûl di Mieç, P.I.C. dal Friûl di Mieç 2002

A sud ovest dal teritori dal Comun di Sedean, dilunc la strade statâl che e puarte di Osôf viers il puint di Cjasarse, e sul confin cul teritori dal Comun di Codroip, tai agns sessante dal secul passât e je nassude la aree industriâl dal Comun di Sedean, clamade Panelie. La zonE e jere ancje cognossude tant che Prâts di Lorêt, par la gleseute fate sù in onôr de Madone di Lorêt.

Toponomastiche
PANELIE: creazion fate tal dì di vuê di un toponim par indicâ la aree industriâl, fate sù tai agns '60 dal secul passât e situade a Sud Ovest dal teritori dal Comun di Sedean. Agnul M. Pittana, I nons dai paîs dal Friûl di Mieç, P.I.C. dal Friûl di Mieç 2002

Un pôc plui a nord di Turide, no tant distant de prepositure de Ete di Mieç di San Durì, si cjate Ridincic, il centri abitât plui piçul dal comun di Sedean. La storie di chest paîs e à però une sô impuartance, soredut pe posizion strategjiche vie pe Ete di Mieç, pal vât sul Tiliment e pal marcjât, che insiemi a chel di San Durì al ven dispès ricuardât tai documents. Ridincic al fo sot la jurisdizion dai siôrs di Spilimberc, di Voleson e di Vignesie, invezit dal pont di viste religjôs al fo e ancje in dì di vuê al è dutun cu la glesie mari di Turide. Viers la fin dal sec. XVIII, daspò de colade de dominazion di Vignesie par mans dal esercit rivoluzionari francês di Napoleon, Ridincic, insiemi cui paîs rivieraschi, al ven cjapât dentri in maniere direte te bataie dal Tiliment vinçude sui austriacs. Tal 1807 Ridincic al fo zontât in maniere definitive al comun di Sedean.

Toponomastiche
RIDINCIC di Sedean (par furlan Ridincìc o Ridicìc): "In Ridincicho"ecc. Toponim prediâl in -icu, forsit di "Hortensius", par mieç "Rotensius", par trasposizion di letaris te peraule (metatesi). Agnul M. Pittana, I nons dai paîs dal Friûl di Mieç, P.I.C. dal Friûl di Mieç 2002

Cheste frazion, paralele al scori dal flum Tiliment, e je une costruzion resinte, se si va a viodi la lungje storie dal paîs. La peraule Rivis e nas de posizion dal abitât vecjo, sui rivâi dal Tiliment, in chê aree indulà che e je plui facil che e sdrumi jù tai timps di plene. Dilunc il timp il titul de plêf di Ripis e fo identificât cun Turide, che dut câs insiemi cun Ridincic e la part a soreli a mont di Grions a fasevin part  de plêf di San Zorç da la Richinvelde. Rivis, in fuarce de presince dal vât, al fo sot jurisdizions difarentis: sot dai siôrs di Voleson, sot dai conts di Gurize(1396), dal secul XV sot dai nobii Savorgnano. La storie religjose di Rivis e à tant che fîl dal discors lis cuistions e la negazion a ricognossi la plêf di Turide tant che plêf mari. Rivis e restà zontade ae plêf dongje fintremai al 1924, an che e fo fate Vicjarie indipendente.

Toponomastiche
RIVIS DI SEDEAN (par furlan Rìvis): "In Rivis" e v.i. Non furlan che e ven dal latin "ripa" cun riferiment clâr ae roste e ai rivâi dal Tiliment. Agnul M. Pittana, I nons dai paîs dal Friûl di Mieç, P.I.C. dal Friûl di Mieç 2002

Paîs une vore antîc viodude la origjine cristiane che e va indaûr ai prins secui de ete di Mieç. Lis vicendis religjosis e eclesiastichis di San Lurinç a son un aspiet impuartant te storie dal paîs. Al è significatîf che i trê paîs che une volte a fasevin part de parochie (Grediscje, San Lurinç e Poç) a vedin vût (prime dal 1600) la cure spirituâl, stabilint che il plevan retôr al vessi di stâ cuatri mês in ognidun des trê localitâts. San Lurinç dal pont di viste aministratîf e civîl al fo dal secul XIII simpri sot la gastaldie di Sedean, sedi ai timps dal domini dal patriarcje di Aquilee, sedi tai timps dal domini di Vignesie. Finide la republiche di Vignesie (1797), daspò des riformis aministrativis metudis in vore di Napoleon, San Lurinç al fo zontât in maniere definitive al comun di Sedean (1807). Par ce che al rivuarde la ete di Mieç e chê veneziane no si cognossin gnovis impuartantis. La vite sociâl dal paîs a faseve stât su la istituzion de vicinie, ven a stâi, la assemblee dai cjâfs di famee par discuti e par cjapâ lis decisions inte suaze dai argoments di interès gjenerâl. La adunance si tignive intun lûc li che cumò e je place Vignesie. San Lurinç al è cun di plui interessât di une cuistion secolâr leade ai fonts privâts che si cjatin dilunc il flum Cuar e che a son in comun cui abitants di Bean e che duncje a son stâts simpri contindûts puartant cussì no a jessi motîfs di cetantis barufis. Vie pe prime campagne napoleoniche (1797), daspò che al fo butât jù il front austriac sul Tiliment, San Lurinç al fo botinât in maniere pesante, e cussì daspò ancje lis trupis dai soldâts austriacs tal 1801. San Lurinç tal 1807 al fo zontât in maniere definitive al comun di Sedean.

Toponomastiche
SAN LURINÇ di Sedean (par furlan San Laurìnc'): non di origjine cristiane. Agnul M. Pittana, I nons dai paîs dal Friûl di Mieç, P.I.C. dal Friûl di Mieç 2002

Turide e à une posizion gjeografiche, leade in maniere direte ae vite dal flum Tiliment, di une bande une vore pericolôs pes sôs plenis e di chê altre tant che pont nevralgjic di confin jenfri dôs diocesis (Concuardie e Aquilee), ma ancje tant che passaç obleât indulà che si pues scjavaçâ il flum facilmentri.  Il periodi de Ete di Mieç al è, dal pont di viste storic, chel plui rilevant par Turide, stant che tal so teritori si incrosin dispès i interès de grande nobiltât furlane, come i Spilimberc, i Zuccola, i Voleson, i Cjistiel e i Savorgnan. La origjine romane di Turide e je sigurade no dome dal non ma ancje de cjatade di reperts e de centuriazion del praedium di Aquilee, che si pues verificâ te disposizion gjeometriche des antighis stradis di campagne, che a dividin il teritori di cheste aree. La particolaritât de storie di cheste localitât e je dade dal fat che Turide fintremai de ete antighe, cun Ridincic, Rivis e part di Grions, e jere sot dal pont di viste eclesiastic de plêf di San Zorç da la Richinvelde, che si cjate a man drete dal Tiliment. La plêf di Ripis, passât il Tiliment, che e corispuint a Turide, e je nomenade tal 1186-87 intune bole di Urban III, indulà che si dîs che e faseve part de diocesi di Concuardie. Di chest si dedûs il distac progressîf de plêf origjinarie e la istituzion de plêf di San Martin di Turide cun lis sôs filiâls zontadis. La storie civîl si fonde su la impuartance dal vât. Tes sostituzions di investiduris une vore frecuentis, Turide e fo proprietât dai siôrs di Spilimberc - Cuccagna (sec. XIII), daspò tal secul che al ven daûr dai Cjistiel, fintremai ae fin dai agns trente. Vie pal secul XIV, il teritori di Turide al passe in maniere graduâl sot il control dai Siôrs di Savorgnan, che indi restin parons ancje dopo, sot la dominazion di Vignesie, che dal 1420 si jere imponude su cuasi dut il Friûl. Il periodi di Vignesie (XV-XVIII sec.) e je une ete une vore difarente di chê precedente soredut pe mancjance di scuintris armâts. Ancje Turide, ae fin dal 1700, e fo cjapade dentri te prime campagne di Napolen. Daspò de colade di Napoleon, i confins eclesiastics de plêf di Turide a forin metûts a puest in maniere razionâl sot dal domini de cjase dai  Asburc. Dal pont di viste civîl e jere bielzà stade zontade al Comun di Sedean tal 1807. Tal 1818 pape Piu VII al ridûs la sede arcivescuvîl di Udin a sempliç vescovât, gjavantle la poie dai vescui e jenfri lis altris disposizions, al gjave la plêf di Turide ae diocesi di Concuardie e la zonte a chê di Udin. Tal segnalâ i moments plui impuartants de storie di Turide no si puedin dismenteâ lis plenis dal Tiliment e soredut chê dal 1692 che e à fat sdrumâ jù cuasi dal dut la glesie di S. Martin e part dal paîs.

Toponomastiche
TURIDE (par furlan Turide): "Vile Turide" e v.i. dal agjetîf latin "turritus", che al ven a fûr de peraule "turris" (=tor). Agnul M. Pittana, I nons dai paîs dal Friûl di Mieç, P.I.C. dal Friûl di Mieç 2002