LA BIBLIOTECHE IN DÌ DI VUÊ

SISTEME BIBLIOTECARI DAL FRIÛL DI MIEÇ

La biblioteche di Sedean e fâs part dal Sisteme bibliotecari dal Friûl di Mieç (SBMF) indulà che a cjapin part ancje lis bibliotechis di chescj comuns: Basilian, Bertiûl, Cjamin dal Tiliment, Cjasteons di Strade, Codroip, Flaiban, Merêt di Tombe, Mortean, Sedean, Talmassons e Vildivar.
A cjâf dal Sisteme e je la biblioteche di Codroip.
I comuns che a fasin part dal sisteme, leâts jenfri lôr cuntune convenzion, a contribuissin aes spesis dal sisteme par mieç di une cuote pro capite fissade de Assemblee dai Sindics in base al numar di abitants. I dovês dal sisteme a son chei di colaborâ par miorâ lis bibliotechis e cualchi ativitât culturâl, par esempli, "Nassûts par lei" e "Otubar, a plovin libris" che a vegnin fats inte suaze comprensoriâl.

 

CATALICS: Sisteme bibliotecari dal Friûl di Mieç

CATALICS altris bibliotechis dal Friûl Vignesie Julie

INFORMATIVE SU LA PRIVACY

IN STRUC LA STORIE DE BIBLIOTECHE CIVICHE DI SEDEAN

Fate sù tal 1973, dopo diviers cambiaments di puescj, la Biblioteche Civiche di Sedean è à cjatât la sô sede, che e je ancje chê dal dì di vuê, al prin plan dal edifici che e cjale su la plaçute Tessitori, daûr dal Municipi. Ai 27 di Avost dal 2005 e je stade intitulade a Angelo Pittana "Agnul di Spere" (Sedean, ai 22 di Avost dal 1930 - Codroip ai 11 di Zenâr dal 2005).

Il so patrimoni, che al conte plui di 12.000 volums, cence contâ i CD musicâi e lis videocassetis, si è metût adun ancje in gracie di diviersis e gjenerosis donazions di materiâl bibliografic.

L'incressi progressîf dal patrimoni al oblee, in dì di vuê, a utilizâ ducj i spazis pussibii, cu la conseguence di dovê alçâ i scansiis in altece, ancje se chest al risulte jessi un pôc limitatîf pe consultazion. Propit par cause di cheste mancjance di spazi al è, magari cussì no, impussibil acetâ lis donazions di libris ufiertis gjenerosementri di tantis personis.

Si è ritignût oportun, dut câs, mantignî tal plan alçât, un ambient adat par ricevi i piçui "nassûts par lei" vie pe "Ore de conte" e lis ativitâts di animazion cu lis scuelis: e ve ca che la biblioteche, tal so 'Solâr des flabis' e ju fâs svolâ suntun 'tapêt magjic' intun mont indulà che i dirits dai fruts a son scrits su lis sfueis dai arbui e la pôre e je dome un dissen.

Il catalic al è cuasi interementri informatizât e al è pussibil consultâlu doprant internet, invezit te sede de biblioteche, dut il materiâl bibliografic che al è esponût tes scansiis viertis si pues consultâ libarementri.

A son stadis metudis adun ancje une sezion furlane e une sezion pai fantats. La sezion furlane e cjape dentri i documents leâts ae culture, ae storie, ai ûs, aes bielecis e ae lenghe de nestre regjon e, jenfri i obietîfs associâts ae istituzion di cheste sezion, si ricuarde chel di mantignî simpri vive e di rinfuarcî la lidrîs culturâl furlane. Cheste finalitât no ven lassade in bande nancje te sezion dai fantats, che, dut câs, e met dongje materiâl pes ricercjis, par studiâ e par lei cun chê di favorî la cressite e il svilup dai fruts prime de etât di scuele, fintremai ai fantats de scuele mezane di prin grât. Dongje di chestis sezions, e je une dedeade a Sedean e ai siei autôrs e cun di plui e je ancje une indreçade ai "zovins adults".